Mumbai-a ruahsur nasain chhiatna a thlenah mi 13 thi

Maharashtra khawpui Mumbai leh a chhehvel bialte chu ruahpui vanawn surin ni li chhung a nuai a, tuilian leh chhiatna hrang hrang thleng avangin mi 13 in an thih phah tawh a ni. Ruah a sur hnem em avang hian sorkar thuneitute leh India meteorological department (IMD) chuan Mumbai, Palghar leh Raigad-ah te 'Red Alert' an tichhuak bawk.

State disaster management minister Girish Mahajan chuan Thawhṭanni khan Assembly-ah chhiatna thleng hi report-in, ruahsur hi a tam hle a, khaw hrang hrangah tuilian leh lei tlahniamte a thlen phah tih a sawi. Mumbai khawpui chhunga Mankhurd bialah in pakhat a chim avangin mi 6 an thi a, hmun dangah thingtluin a delh vanga thi leh naupang school bus-a chuang lai, thingtluin a delh avanga boral an awm bawk.

IMD scientist Bikram Singh sawi danin, Lonavala khawpuiah ruah tui tla millimeters 670 a tling a, he lai biala ruahsur nasat ber ṭum a tling tawh a ni. Ruahsur hian rel leh lirthei tlan pawh a tibuai hle. Lonavala bialah leimin vanga in pakhat chimin chhungkaw pakhat a chhilh avangin chhan chhuahna hna thawh mek a ni. Chief minister Devendra Fadnavis chuan sorkar chu a theih ang angin chhiatna hmachhawn tur hian an inring reng tih puangin, mipuite fimkhur turin a chah.