Indonesia-in India hnen aṭangin BrahMos missile lei dawn

Indonesia chuan India hnen aṭangin BrahMos supersonic missile leh air-to-air missile 'Astra' a lei dawn. Hemi atana inremna thuthlung chu Indonesia ram tlawha zin, prime minister Narendra Modi leh Indonesia president Prabowo Subianto ten Jakarta-a inbiakna an neih hnuah tihfel a ni. Indonesia hi Southeast Asia ram zingah Philippines leh Vietnam dawtah India BrahMos missile leina tur thuthlung ziaktu ram pathumna a ni.

Indonesia hian ralthuam leina tur ruahmanna a siam hmasakah BrahMos battery pakhat leh missile 12, USD mtd 100 turin a ti a; mahse, ruahmanna a siam thar battery pahnihah tipungin USD mtd 200-ah a tipung a ni.

India leh Indonesia hian Malacca Straits kawtchhuaha Sabang-Aceh port pawh ṭangkawpa a siam chhunzawm an remti bawk. He hmun hi India rama Great Nicobar Project, Campbell Bay-a bungraw thawn chhawnna hmunpui siamna tur nen hian 160 km chauha hla a ni.

Ralthuam supply-na tur contract hi BrahMos Aerospace leh Indonesia Defence Ministry te chuan an hming an lo ziah hnan tawh a, ram pahnih inkara venhimna kawng tihchak chhoh zel a nihna tura hmalakna a ni tih an tarlang. Missile leina tur thuthlung mai bakah hian, ram hnih hruaitute hian tuipui buaina laka himna 'maritime safety' leh Andaman tuipuia offshore energy, lawng siamna leh marine-tourism lama thawhho zel dan tur te, Sabang Port hmasawnna tura thawh ho dan tur pawh an rel chho zui bawk.