Narmada project buaina chingfel; State paliin inremna thuthlung an ziak

India rama lui sei pangana, Narmada lui chungchanga state hrang hrang inrem lohna avanga kum tam tak chhung chhawmdawlna leh zangnadawmna chungchang tangkhang reng tawh chu chinfel a ni ta. Thawhlehni khan Madhya Pradesh, Gujarat, Rajasthan leh Maharashtra state-te chuan inremna thuthlung chu union home minister Amit Shah hona hnuaiah an ziak.

Narmada project chungchangah hian lui tui insem dan tur leh, 'dam' siam dan chungchangah te, project thawhin a nghawngte hnena zangnamdawna pek dan turah state palite hi kum tam tak an lo buai tawh a ni.

Inremna thuthlung hi New Delhi-ah neih a ni a, Maharashtra CM Devendra Fadnavis, Gujarat CM Bhupendra Patel, Rajasthan CM Bhajan Lal Sharma leh Madhya Pradesh CM Mohan Yadav-te chuan hming an ziak a ni. Sardar Sarovar Project saknaa sum sen insem dan tur chungchanga buaina awm ṭhin chu chinfel a ni bawk.

Union home minister Amit Shah chuan he inremna hi ‘cooperative federalism’ entirna ṭha tak a nih thu sawiin, prime minister Narendra Modi-a hruaina hnuaiah state hrang hrangte inkar buaina tam tak chinfel a nih tawh thu a tarlang. He project hian Gujarat, Madhya Pradesh leh Rajasthan-te nasa takin a tihmasawn dawn tih a sawi.

He inremna hnuaiah hian compensation chungchang leh leiba la awm zawng zawngte chu 'one-time settlement' hmanga fel vek tura ruahman a ni. Hemi hma, June 29 khan Rajasthan leh Haryana pawhin Yamuna Water Project chungchangah inremna an lo ziak tawh bawk.