India leh New Zealand-in thawh dunna thar an siam

Prime minister Narendra Modi leh New Zealand prime minister Christopher Luxon-te chuan Inrinni khan Auckland khawpuiah inbiakna pawimawh tak neiin, ram pahnihte inlaichinna neih mek chu 'strategic partnership'-ah an hlangkai. Ram pahnih inkara sumdawnna nasa taka tihlen tum a ni.

Hruaitu pahnihte hian goods and services a insumdawn tawnna chu Rs vbc 35,000 tling turin hmalak an rel a ni. Hei thil tum hi hlawhtlin theihna turin Free Trade Agreement (FTA) pawh a rang thei ang bera hman tum niin, he inremna hian ram pahnih inkara indawr tawnna chu nasa takin a tihmasawn thei dawn a ni.

An inbiaknaah hian thawh dunna tur hmachhawp hrang hrang 18 pawm a ni a, chung zingah chuan inremna thar 10 a tel. Inremna hnuaiah hian Indo-Pacific tuipui huam chhunga venhimna kawnga thawh dun te, Indian Navy leh New Zealand Defence Force-te inkara nunchan zir ho leh logistics support pact-te a tel abwk. PM Modi chuan ram pahnihte chu tuipui kam ram pawimawh an nih anga thawh dunna nghet zawk an neih hian Indo-Pacific bialah remna leh hmasawnna thar a thlen dawn tih a sawi.

West Asia biala indona leh buaina thleng mek chungchangah hruaitu pahnihte hian an lungawi lohna lantirin, mipui venhimna ngaihpawimawh a nih theih nan inremna kawng zawngtu nih an duh thu an tarlang. United Nations Security Council tihphuisui leh thlak danglam rawtna pawh an thlawp thu an sawi bawk a ni.

Prime Minister hi ram pathum - Indonesia, Australia leh New Zealand tlawhin a zin kual a, New Zealand hi tlawh hnuhnung berin ni hnih a cham hnuah Inrinni vek khan India ramah a rawn kir a ni.