Oman bula lawng beiha tel India mi 10 chhan chhuak, chinhriat loh pakhat awm

US leh Iran inkahhai puan sut a nih hnuah West Asia huamchhung tuipui a buai chho leh mek. Pathianni khan Oman tuipui bula sumdawnna lawng 'GFS Galaxy' chu beih a ni a, he lawnga chuang India mi 11 zinga 10 chhan chhuah tawh niin, pakhat erawh chin hriat lohin a awm mek tih Ministry of External Affairs (MEA) chuan a tarlang.

MEA thuchhuah tarlan danin, Oman-a India Embassy chuan he thil thleng hi ngun takin a thlithlai mek a, zawnna leh chhanchhuahna hna thawk turin Oman thuneitute nen an inbe pawh reng a ni. India sorkar chuan an ṭanpuina avangin Oman thuneitute hnenah lawmthu a sawi bawk.

Tun hnaia he biala sumdawnna lawng leh civilian infrastructure bitum a ni fo mai chu 'lungawi thlak loh leh pawi tak' a nih thu MEA chuan sawiin, he buaina hi a rang lama tihtawp a, diplomatic solution hmanga inremna neih a ṭul tawh hle a ni, a ti. International law zulzuiin tuipui kawnga zalen taka sumdawnna kalpui leh vat a ngai a ni, tiin MEA chuan a tarlang.

February 28-a US leh Israel-in Iran an beih avanga West Asia bial buaina chu a la reh thei lo. US leh Iran hi inkahhai an puan hnuah an inbei thar leh a, hei vang hian Iran pawhin Strait of Hormuz chu lawng kaltlang theih loh turin a khar zui leh tawh bawk a ni. Iran-in Strait-a lawng a kah avangin US chuan Iran sipai hmun hrang hrang a kap zui ve leh nghal bawk.