Delhi boruak bawlhhlawh ziaawm thei lo Odd-even scheme hmang leh dawn
Delhi khawpui boruak bawlhlawh chuan ziaawm lam a la pan thei lo a, nimin zing dar 9 thleng khan pollution level hi 'severe category' ah a la awm.
Diwali lawmnaa halpuah leh halmawi khu bakah, Delhi ṭhenawm state-a thlai ro hal khuten nasa taka a bawh tel avangin Delhi leh a chhehvel boruak hian bawlhhlawh lam a pan zel a ni. Hei vang hian kar kal ta Zirtawpni khan Environment Pollution (Prevention & Control) Authority chuan Delhi khawpuiah hian public health emergency a lo puang tawh bawk.
Boruak bawlhhlawh tihziaawmna tur kawng khat atan, Delhi sorkar chuan vawiin aṭangin motor number kawpkim leh kawpkim lo intlanchhawk, odd-even scheme a hmang leh dawn. He scheme hi November 15 thleng hman phawt a ni ang. Dan bawhchhiate chu Rs 4,000 zel chawitir an ni ang.
Chief minister Arvind Kejriwal chuan sorkar laipui chu a rang thei anga hma la turin a ngen a, a kaihhruai sorkar chuan boruak bawlhhlawh zel tur venna atana sorkar laipui hmalakna chu a thlawp zel dawn tih a sawi bawk. "Pollution level hian tawrh theih loh chin a thleng tawh a ni. Delhi sorkar chuan kawng hrang hrangin hma pawh a lo la tawh a, Delhi khawpuia chengte chuan an tihsual ni loah nasa takin an tuar tawh a ni," a ti.
Delhi ṭhenawm state-a thlai ro hal khuin Delhi khawpui boruak a tihbawlhhlawh dan leh Delhi pollution level chungchanga EPCA report chu nimin khan Supreme Court chuan a ngaihtuah bawk.
Khawpui boruak bawlhhlawh vangin Delhi sorkar chuan Thawhlehni thleng school a khar tir. Naupangte chu pawn lama chhuak tam lo turin a ti a, school hrang hrang hnenah outdoor activity leh sports-te nei rih lo turin a ti bawk. Nimin khan Noida pawhin Thawhlehni thleng school khar tur a nih thu a puang ve leh bawk a ni.
Delhi aṭanga pemchhuah duh an tam
Online platform LocalCircles in survey a neih thar berah, Delhi leh National Capital Region (NCR) a cheng zinga 40% chuan,Delhi boruak bawlhhlawh zel vang hian khawpui danga pem an duh thu an sawi. Hetih lai hian 31% chuan Delhi-ah chen zui zel a, mahse air purifier, mask leh hmanraw dangte an mamawh tur thu an sawi thung.
Zawhna chhangtu zinga 16% chuan Delhi NCR boruak bawlhhlawh zual lai chuan hmun dangah zin chhuah zel an duh tih an sawi a, 13% erawh chuan Delhi-a khawsak zui zel loh chu thlan tur dang an nei lo tih an sawi ve thung.
Zawhna chhangtu zinga 44% chuan pollution vang hian an hriselna lamah nghawng a neih thu an sawi a, 14% erawh chuan an hriselna lam a nghawng hran lo tih an sawi.