Congress hruaitute Monsoon session neih tur pualin inhmukhawm

Congress party hruaitute chu July 20-a parliament monsoon session lo awm tur atana inpuahchahin, an ṭanchhan leh bitum tur hrang hrangte sawiin nimin khan New Delhi-ah an inhmukhawm. Meeting hi Congress Parliamentary Party (CPP) chairperson Sonia Gandhi inah neih a ni a, party hruaitu lawk tak tak an kalkhawm a ni.

Meeting-ah hian parliament session lo awm tur atana ṭan hmun turte, house a au chhuahpui tur thil leh hmalak ngaihna hrang hrangte ngaihtuah a ni. Eptu ṭangrual pawl, INDIA bloc chuan karleh Thawhṭanni khian strategy meet a nei dawn bawk a, hetah hian session atana thawh ho theihna tur hrang hrangte ngaihtuah a ni bawk ang.

Hetih laiin sorkar laipui pawhin party hrang hranga hruaitute chu Pathianni khian ṭhutkhawm a neihpui dawn a, session-a sawiho tur awm hrang hrangte a sawipui dawn a ni. Eptu pawlte chuan session lo awm turah hian tun hnaia sorkar chak lohna lantirtu hrang hrangte ngaihtuah an phut dawn a, Indo-US trade deal leh oil man sang chungchangte chu sawi ho an phut tur zingah hian a tel rin a ni.

Sorkar lam hian session-ah hian bill hrang hrang ngaihtuah nawn tur leh a thar an pu lut leh dawn a,bill put luh nawn turte hi session hmasa lama tlang zo ta lote kha a ni. House-ah hian NDA lam thlawptu an tam belh tawh avangin bill te pawh hi a tlang tawh ngei a rinawm.