Animated film khap vangin SC-ah zualko

Hindu sakhaw lehkhabu 'Skanda Purana' nena a inmil loh vanga animated film 'Mahaprabhu Jagannath' chhuah tur Orissa High Court-in a khap chungchangah a siamtu Ele Animations chu Supreme Court-ah a zualko a, SC chuan he ngenna hi vawiin Zirtawpni hian ngaihtuah a remtihsak.

He animated film hi cinema hall 300 velah chhuah ṭan tura ruahman a ni a, mahse, Orissa HC chuan Nilaini khan ram chhunga chhuah khapna thupek a chhuah thut a ni. Ele Animations aiawha ding senior advocate Devadatt Kamat chuan court hmaah he thil hi thlenin, he film hi naupang tana siam a nih thu leh Central Board of Film Certification(CBFC) pawhin phalna a lo pek tawh thu a sawi.

Kamat chuan film chhuah ṭep tawha khap a nih avang hian sum tam tak an hloh phah dawn a, court-a thubuai thehluttute khan Odisha chhung chauh khap turin an dil a, mahse, court chuan ram pumah a khap ta zawk a ni, a ti. Mahesh Kumar Sahu leh mi dang pahnihin High Court-a PIL theh lutin, film-a Lord Jagannath an chei dan an duh loh avanga khap an dil hnuah court chuan a khap zui ta a ni. SC chuan he ngenna hi vawiin hian a ngaihtuah nghal ang.