J&K-a rorellaiin state nihna pek mai loh vangin nawrh huaihawt dawn

Jammu and Kashmir-a rorellai, National Conference (NC) kaihhruainain July 20 khian New Delhi-a Jantar Mantar hmuna state nihna pek an nih leh tak mai loh avangin lungawi lohna lantirin nawrh an huaihawt dawn. Hetih laiin J&K BJP unit erawh chuan chief minister Omar Abdullah kaihhruai sorkarin policy outsourcing vangin Srinagar-ah secretariat gherao neih an tum ve thung.

NC chuan nawrh huaihawt turah hian ram chhung hmun hrang hranga political party hruaitu 56 te chu tel pui turin an sawm a, an sawm zingah hian Congress president, bakah Tamil Nadu chief minister-te chu a langsar zual an ni.

CM Abdullah chuan Delhi sorkar lamin nawrh huaihawt an tumna hi remtihna la pe lo mah se kalpui tlang an tum thu a tarlang a, " A hmun tur emaw a kalhmang tur emaw chu thlak danglam a ni maithei a, mah se Delhi-a kalpui tum erawh tihtlang a ni ang" a ti. An party chuan khawilai emawa biru chungin lungawi lohna lantir an tum loh thu a sawi.

Sorkar thar lak luh anih velah, CM Abdullah kaihhruai cabinet chuan J&K state a hlankai phutna resolution an pass nghal a, he an resolution copy pawh hi prime minister Narendra Modi, home minister Amit Shah, defence minister Rajnath Singh leh sorkar laipuia hruaitu lawkte hnenah an theh lut bawk. Hetiang a ni chung hian an ngenna thlenah hmasawnna engmah a la awm lo a, hei vang hian nawrh huaihawt hi an kalpui dawn ta tih NC chuan an tarlang.