Jail-a tang kum upa damlote chhuah tir hmana tur policy duang turin ti

Supreme Court chuan Ningani khan ram chhunga state leh Union Territory (UT) zawng zawngte chu jail-a tang mek, tar chak lo leh natna benvawn 'terminally ill' vanga thih hnaih tawhte chhuah zalen hma an nih theihna tur policy chu thla thum chhunga duang turin a hriattir.

Justice Vikram Nath leh Justice Sandeep Mehta-te ṭhutna bench chuan National Legal Services Authority (NALSA) petition thehluh, jail hrang hranga damlo na zual tawh tak takte chhuah zalenna tur dan mumal a awm loh chungchanga lungawi lohna thlen chu a ngaihtuah hnuah thutlukna hi a siam a ni. Court chuan jail chhung chep lutuk tihtlem nan leh mihring dikna leh zahawmna humhalh nan he hmalakna hi a pawimawh hle tih a sawi.

Hemi atan hian state sorkarte chu independent medical board siam a, damlote dinhmun enfiah tur leh, diltute chungchang pawh hun bithliah siam tur leh ṭha taka kalpui a nih theih nan 'e-Prisons' portal nena thlunzawm vek turin a ti a ni. State leh UT-te hi thla ruk chhunga an hmalakna affidavit court-a thehlut turin a hriattir nghal bawk.