All-party meeting aṭangin eptu pawlte chhuak tau

Sorkar laipui chuan tihdan phung pangngai angin nimin Pathianni khan Parliament Monsoon session lo awm tur atana hmachhawp leh session kalpui dan tur party tinte hnena inhrilh hriatna hun all-party meeting a ko a, eptu pawl hruaitute chu meeting neihna aṭangin an chhuak tau. Eptu pawlte hi sorkarin Nationalist Congress Party of India (NCPI) te meeting-a tel ve tura a sawmna an duh loh vanga chhuak tau an ni.

All-party meeting hi session neih tur a rorelna mumal leh tluang tak, a awm theihna tur atana session ṭan hma niin neih a ni ṭhin. Trinamool Congress (TMC) MP 20 lungawi lo ten NCPI an zawm tak hnuah, NCPI hi meeting-ah tel ve tura sawmna siam chu duh loin eptu hruaitute hian lungawi lohna an lantir a ni.

Congress hruaitu Jairam Ramesh chuan X kaltlangin an lungawi loh thu hi a tarlang a, MP lungawi lote insawnna party chu speakerin a la pawmpui hma leh , thutlukna siam fel a nih hma hauha sawmna lo siam nghal chu thil dik nia an hriat loh thu a sawi. TMC senior MP Saugata Roy chuan ECI in an website-ah pawh a political party anga a la pawm hma hauha NCPI sawmna pek ve ngawt chu thil nih dan tur a nih loh thu a sawi ve bawk.

Eptu pawlte chuan Lok Sabha speaker Om Birla-a'n TMC MP chhuak taute seat hrang a lo pe leh, Shiv Sena titau UBT MP te nena thawh ho a phal mai chu an duh loh thu an tarlang. TMC aṭanga chhuak taute hi parliamentary affairs minister Kiren Rijiju chuan Inrinni liam ta khan all-party meeting-a tel ve turin an hotupa ber, Sudip Bandyopadhyay hnenah sawmna a lo pe a ni.