Eptu MP-ten Parliament pawnah lungawi lohna lantir

Parliament Monsoon session ni thumna chu nimin khan ṭhutkhawm leh niin, eptu pawl MP-te chuan tun hnaia thil thleng hrang hrang avangin union home minister Amit Shah leh education minister Dharmendhra Pradhan te chu bang turin an phut. Eptu MP-te hian thawmhnaw dum inbelin, puan dum a bat bawk a, lungawi lohna thuziakte an keng bawk.

Eptu pawlte hian Thawhṭannia Cockroach Janta Party (CJP) huaihawta zirlai kawng zawhte police in tharum hmanga an lo beih let chungchangah minister pahnihte hi bang turin an phut a ni.

Congress MP Priyanka Gandhi Vadra chuan zirlaite hian zawldawh takin an dikna neihte hmuh an phut thu a sawi. Education budget atana sum ruahman, Rs vbc nuai 1.4 aṭanga Adani leh Ambani company-te tana loan Rs vcb nuai 16 hman ral a nih thu a tarlang a; paper leak a thleng reng leh zirlaiten ralmuang taka nawrh huaihawt an kalpui thei lo chu democracy rahbehna a nih thu a sawi lang tel bawk.

Parliament kawta MP pungkhawm zingah hian Congress, SP, Left Party, RJD, TMC, JMM leh a dang party tenau eng emaw zat an tel a; a hmain house chhungah NEET paper leak chungchang sawi ngiatin inauh buaina a chhuak bawk. Hetih laiin parliamentary affairs minister Kiren Rijiju chuan NEET-UG paper leak chungchangah sorkar chuan debate neih a inpeih thu Lok Sbha-ah a sawi.