NSB chairman leh member tur dilna thehluh hun pawt sei leh

Ram chhunga infiammite nghahhlelh pawl din tur, National Sports Board (NSB) chu din theih a la ni dawn lo a, Union Sports Ministry-in chairman leh member dilna thehluh hun chu ni 15 chhung a pawtsei leh a ni. Dilna hi August 6, 2026 thleng thehluh theih a ni ang a, hemi hnu hian selection board lamin theh luhte aṭangin an thlang chhuak leh dawn a ni.

Ruahmanna hmasaah dilna thehluh hun hi Ningani July 22 thleng kha a ni a, mahse Sports Ministry chuan a pawtsei leh ta a ni. NSB member-te ruat tur hian Cabinet Secretary T.V. Somanathan hoin Search-cum-Selection Committee siam a ni a; committee-ah hian Olympic bronze medalist shooter Gagan Narang, weightlifter hmingthang N. Kunjarani Devi, Sports Secretary Hari Ranjan Rao leh Indian Olympic Association(IOA) Executive Council member Lt. Gen. (Retd.) Harpal Singh-te an tel.

NSB member turte hi public administration, sports governance leh sports law thiamna leh tawnhriat nei ṭha bik, rintlak leh hmingṭha an ni tur a ni a, kum 65 aia upa lo an ni tur a ni bawk. Kum kalta August thlaa pass tak National Sports Governance Act hnuaiah he board hi din a ni dawn a, infiamna pawl hrang hrang endik leh invawnna mumal tak siam chu a thil tum ber a ni.

Sports Ministry chuan National Sports Tribunal (NST) a member tur dilna hun pawh July 25 thleng a pawtsei. Ram chhung court hrang hrangah infiamna kaihhnawih thubuai case 350 aia tam a awm mek a, he tribunal hian chung thubuaite chu Civil Court thuneihna hmanga a rang lama a chinfel pui theih a beisei a ni bawk.