PM Modi leh Suu Kyi inkawm

Prime minister Narendra Modi leh Myanmar State Coun­sellor Aung San Suu Kyi-te chu Pathianni zan khan Bangkok-ah an inkawm a; Sittwe port, Kaladan Multi-Modal Transit Transport Project leh ramri chungchangte an sawi dun. 

Hruaitu pahnihte hi Asso­ciation of Southeast Asian Nations (ASEAN) summit hmang tura zin an ni. PM Modi hian Suu Kyi bakah Thailand prime minister General Prayut Chan-O-Chan leh Indonesia president Joko Widodo te meeting a neihpui bawk a ni. 

Modi leh Suu Kyi-te hian ram pahnihte thawhdunna ṭha leh zau zawk siam dante an sawidun. Suu Kyi chuan India sorkar nena an thawhdunna pawimawhzia te sawiin, Myanmar rama democracy tundin leh hmasawnna tura India-in a puihna ṭangkaizia te a sawilang. Hruaitu pahnihte chuan ramri boruak muanawm tak chu thawhdunna ṭha zawk neih zelna atan thil pawimawh tak a nih thu an sawi. 

Narendra Modi chuan India-in Look East Policy leh Neigh­bourhood First policy a kalpuinaah Myanmar pawi­mawhna te a sawichhuak a, kawngpui, port leh infrastructure dang hmanga Myanmar kaltlanga Southeast Asia ramte nena inkalpawhna ṭha zawk siam chu India-in a tum a ni, a ti. 

Myanmar-a Sittwe Port hi India puihnaa siam a ni a, Kaladan Multi-Modal Transit Transport Project hnuaia mi a ni. Kum 2018, October 22 khan he Port siamna tur hian India leh Myanmar chuan memorandum of understanding (MoU) an lo ziak tawh a ni.