CJI Surya Kant-a'n media mite fimkhur tawk loah puh

Chief Justice of India (CJI) Surya Kant chuan nimin khan Coackroach Janta Party (CJP) lungawi lohna lantirnaa police-te chetdan chungchanga Court-a ngenna lut chu CJI-in a hnawl nia media-ten thuthang dik lo an thehdarh chu 'mawphurhna nei lo leh fimkhur tawk lohna a ni' tiin a sawisel.

CJI Surya Kant chuan open court neihah, Registry aṭangin he thil chungchangah dan pangngai anga writ petition theh luh a awm lo a, media-te chuan a dik lo zawng leh belhchian dawl lo hmangin thu an thehdarh a ni, a ti.

Kant chuan, "Ni hnih chhung chu he thil hi Court-ah theh luh a nih thu dik lo taka thehdarh a ni a, nimin zing dar 10 thleng pawhin phek khat mah thu theh luh a awm lo. Mishra emaw tu emaw representation rawn thawn mai a ni a, hetiang hi engtin nge court-in writ petition angin a pawm theih ang? Mahse media-te chuan chhui chiang loin dik lo takin an ziak chhuak chiam mai a ni," tiin a mawhphurhna nei lo ang maia media chetdan chu pawi a tih thu a sawi.

Nilaini khan advocate Narendra Mishra chuan CJP protest laia Delhi Police-te tharum hman dan tarlangin bench hmaah thu a lo thlen tawh a, he bench-ah hian CJI Surya Kant, Justice Joymalya Bagchi leh Justice V. Mohana-te an thu a ni. Hemi ṭum hian CJI chuan a hun leh court hun khawhral lo turin a lo hriattir a, video en tura a ngenna pawh ṭawngkama sawi mai a nih avangin en kher a tum loh thu a lo hrilh tawh bawk a ni.