Grenade hmangin Srinagar bazar bei

Srinagar-a Maulana Azar road-a bazar chu nimin khan grenade hmangin beih a ni. Bazar beihnaah hian mi pakhat a thi a, mi dang 13 in hliam an tuar. Hei hi kar hnih chhunga Jammu and Kashmir-a grenade hmanga inbeihna a thlen ṭum thumna a ni. 

Kar liam khan Kashmir hmar lam, Sopore khuaa bazar hmuna bus stand chu firfiak pakhatin grenade hmangin a lo bei tawh bawk a, mi 20 in hliam an tuar a ni. October 26 khan CRPF team-in checkpost-a motor an endik lai chu firfiakten grenade hmangin an lo bei tawh bawk a, sipai parukin hliam an tuar. 

J&K special status pekna, Article 370 tihtawp a nih hnuah venhimna khauh taka kalpui ni mah se, firfiakten state dang aṭanga lut motor leh hna­thawktute an bei fo a ni. October thla chhung firfiakte beihna avangin state dang aṭanga lut civil mi 11 thah an ni.