Maha BJP hruaituten inthlan ṭhat duh

Maharashtra assembly inthlan neih zawh taka hnehna changtu, Shiv Sena leh BJP chuan ṭangrual sorkar siam turin inremna an la siam thei lo. BJP hruaitu ṭhenkhat chuan inthlan ṭhat mai an duh tawh nia sawi a ni. 

Shiv Sena leh BJP hi thawkdun mah se, sorkar thar siam tura chanvo insem dan turah tun thlengin an la inrem thei lo. Shiv Sena hian chanvo hi 50:50 a insem an phut a, hei hi BJP lamin an pawmpui thei lo. Party pahnih hruaitute hian ṭum eng emaw zat inbiakna nei tawh  mah se, an la inrem thei lo. Shiv Sena hian BJP  nena an thawhdunna chu zahawm ti hle mah se, midang thawhpui tur zawnga an nawr  hun a  thleng thei mai dawn niin an sawi. 

Hetih lai hian Pathianni-a review meeting an neihah BJP hruaitu ṭhenkhat chuan Shiv Sena nena thawh dun hi an duh tawh lo tih sawiin, inthlan ṭhat neih mai an duh tawh zawk tih an sawi. Inthlan hmaa Shiv Sena nena thawk dun a, seat an insem avangin an party mi leh sa tam takin seat an chan loh phah a, hei vang hian party  mala inthlan hi chuh an duh thu leh, sorkarna siam tura an tlin ngei tur thu an sawi a ni. 

Maharashtra assembly term kal lai hi November 9 hian a tawp tawh dawn a ni. Assembly inthlan neih zawh takah khan assembly seat 288 awmah BJP in seat 105 lain, Shiv Sena hian seat 56 a la. Nimin khan chief minister Devendra Fadnavis chuan BJP national president leh union home minister Amit Shah chu Delhi-ah a hmu a, sorkar thar siam tur chungchang a sawipui. Amit Shah nena meeting an neih hnua chanchinthar lakhawmtute a kawnaah, Fadnavis chuan Maharashtra sorkar thar chu a ding thuai dawn tih a sawi.