NEET-UG paper leak kaihhnawihah mi 13 lakah charge sheet theh lut

Central Bureau of Investigation (CBI) chuan Thawhlehni khan NEET-UG 2026 exam paper leak chungchanga mawhphurtu nia hriat mi 13-te lakah charge sheet an theh lut. Mi 13-te hi judicial custody-ah dah mek an ni.

CBI hian criminal conspiracy, cheating, criminal breach of trust leh evidence tihchhiat chungchang bakah Prevention of Corruption Act leh Public Examination Act hmangin thubuai an ziak lut nghal bawk. Charge sheet-ah hian witness 360, document 422 leh material objects 43 tarlan tel a ni.

May 3-a NEET-UG 2026 exam neiha thil dik lo awm chungchanga Department of Higher Education-in May 12-a complain a theh luh hnuah CBI chuan chhui zuiin, thubuai hi a theh lut a ni. An thil chhuinaah hian CBI chuan official 72 leh cyber forensic expert 8 awmna team hrang hrang siamin Delhi, Haryana, Rajasthan leh Maharashtra-a hmun 92-ah dapchhuah beihpui an thlak bawk.

Man zingah hian National Testing Agency (NTA) subject expert pathum -P.V. Kulkarni (chemistry), Manisha Gurunath Mandhare (biology) leh Manisha Sanjay Havaldar (physics) te an tel. Heng bakah Maharashtra-a RCC Coaching Institute neitu Prof. Shivaraj Motegaonkar leh APMA Coaching Institute, Pune a mi Tejas Harshadkumar Shah te pawh an tel bawk a ni.