'Zahna chhete tal in la neih chuan Amit Shah hi bantir rawh u' - Congress President

Congress party president Mallikarjun Kharge chuan sorkar laipui chuan tun hnaia zirlai nawrh huaihawtte chu an nawrh an tihtawp hnuah an laka phuba lak tumin FIR a theh lut niin a puh. Prime minister Narendra Modi leh union home minister Amit Shah-te chuan an thutiam hlen lo a, zirlaite chunga an chet dan avang chuan bang turin a phut tih a sawi.

Kharge chuan nimin khan X-ah hemi chungchang hi post in, BJP sorkar chuan NEET paper leak avanga lungawi loa nuarte chu, nawrh an tihtawp chuan an chungah hremna engmah pek an ni lo ang tiin a tiam a ni, a ti. Mahse, nawrh an tihtawp hnuah sorkar chuan phuba a la zui a, zirlaite laka FIR te theh lutin hren theih turin an siam zui a ni, a ti. "Ni 10 liam taah khan i kaihhruai sorkar chuan ṭhlaite chu tiang leh pellet gun hmangin a bei a ni," tiin PM Modi a chhal zui.

Nawrh huaihawta tel ṭhalai eng emaw zat social media account-te pawh block sak an ni tih sawiin, Kharge chuan sorkar chu he thil thleng chungchanga a mawhphurhna pumpelh tumah a puh a, Parliament-ah pawh home minister Amit Shah chuan engmah a sawi chhuak lo a ni, a ti. An mualphona tur pumpelh leh hmingṭhatna humhim tuma an thiltih chuan awmzia a nei tawh lo tiin, "ṭhalaiten in chungchang thudik an hre tlang vek tawh a ni,” a ti. “Zahna chhete tal in la nei a nih chuan, Amit Shah-a hi bantir rawh u,” a ti.