Odisha state-ah tuilianin khaw 1,500 chuang a chim

Odisha state-ah ruahsur nasa avanga tuilian chuan thingtlang khaw 1,510 a chim a, district 20-ah mi nuai sarih chuang chu tuilian hian a nghawng mek a ni. Chhiatna thlengah mi pathum an thi tawh bawk.

Official-te chuan tuilian hian thlai chinna ram tam tak a chim tawh a, nunphung pawh a tibuai hle tih an sawi. Bhadrak chu a tuar nasa ber district niin, mi nuai li velin harsatna an tawk a, Balasore leh Jaipur-ah mi nuai 1 chuang ve ve tuilian hian a nghawng buai bawk. State sorkar chuan Bhadrak-ah hian tuilian tuarte awmna tur, relief camp 234 a siam tawh a, heng hmunah hian mi nuai chuang an khawsa mek a ni.

Revenue and disaster management minister Suresh Pujari chuan nimin khan thlawhtheihna hmangin tuilenna bial hrang hrangte a enkual a ni. Tuilian hian hmun tam zawkah ziaawm lam pan tawh mah se, thil a tichhe nasa hman hle tih a sawi.