Iran-a India ambassador atan MEA joint secretary Vishwesh Negi ruat

Ministry of External Affairs chuan nimin khan MEA joint secretary ni lai Vishwesh Negi Islamic Republic of Iran-a India tana palai hna thawk turin. ambassador thar atan ruat a nih thu an puang.

Negi hi 2002 Indian Foreign Service(IFS) batch a ni a, Iran ambassador ni lai Rudra Gaurav Shresth a thlak dawn a ni. Shresth hi Turkey-ah sawn a ni ve thung. A hna thar a zawm hun tur hi sawi lan ani lo a, mahse sorkar thuchhuah chuan a zawm thuai dawn niin a tarlang.

Iran leh US te indo mek lai leh, Iran-in Strait of Hormuz a khar a nih avanga oil leh energy lama harsatna thlen mek karah, India leh Iran inlaichinna vawnṭhat a ngaih lai tak, hun pawimawh tak a ni. Hemi karah hian Negi hi ambassador thar atan hian ruat a ni. A hna thar atan hian diplomacy leh inrelbawlna lama a tawnhriatte a ṭangkai hle beisei a ni.

West Asia huam chhung tuipui kawnga lawng leh thawktute himna pek chungchangah hian EAM S. Jaishankar leh Iran foreign minister Syed Abbas Araghchi-te chu telephone kaltlangin an lo inbe tawh a, commercial lawng beihna thleng ṭhin avanga venhimna khauh zawk kenkawh a nih dan tur chungchangte an sawi dun bawk.

Jaishankar chuan Iran FM Araghchi nen an inbiak thu hi X kaltlanga tarlangin, West Asia huam chhung tuipui kawng ralmuang lo tak himna siam dan tur an sawi dun thu hi a tarlang. Supreme Court pawhin MEA chu Black Sea-a drone hmanga lawng beihna thlengah lawnga thawk India mi te zawn chhuah hna thawk tur hian a hriattir tawh a ni.