Kerala-ah ruahsur vanga chhiatna thlengah mi 15 thi

Kerala state chhung hmun hrang hrangah ruahsur nasain a thlen chhiatna hrang hrang avangin mi 15 in nunna an chan tawh a, mi dang pasarih chin hriat lohin an bo mek bawk. Ruah sur vang hian rel leh thlawhtheihna service pawh a khaihlak phah nasa hle bawk.

Wayanad, Idukki leh Malappuram district-ah te leimin hi a thleng nasa zual a, chhungkaw tam takin an in leh lo an chan bakah tui lianin in tam tak a la tel bawk.

National Disaster Response Force (NDRF) leh Indian Army te chu chhan chhuah leh chhawmdawlna hna thawk tura tirh luh an ni a, tualchhung mite nen ṭangkawpin mi bote zawn leh leiminin kawngpui a chhilhte thenfai hna an thawk mek a ni.

Kerala chief minister V.D. Satheesan chuan sorkar thuneitute chu inring renga awm tur leh relief camp-te zau zawk leh tha zawka din a, khuarel chhiatna tuar mek te hnena ei tur leh damdawi rang taka pe turin hriattirna a tichhuak. Relief camp-ah hian harsatna tawk mi 7,600 vel an khawsa mek a ni. India Meteorological Department (IMD) chuan ruah hi nasa zawkin a la sur chhunzawm zel dawn nia sawiin, nimin district 14 ah yellow alert a tichhuak.