Parliament Monsoon Session-ah bill pahnih pawm

Parliament Monsoon session neih mekah nimin khan Lok Sabha-ah The Appropriation (No. 3) Bill, 2026 bill pawm a ni a, Rajya Sabha-ah Births and Deaths (Amendment) Bill, 2026 pawm a ni bawk. Rajya Sabha-ah hian Thawhṭanni khan MSME Development Bill, 2026 chu pass a ni tawh bawk.

Session neih mekah eptu party MP-te hian Ram Mandir thawhlawm ruk bo leh Delhi-a zirlai nawrh huaihawtte chunga police-te chet dan chungchangah Parliament tualah lungawi lohna an lantir bakah, House chhungah pawh an aubuai zui a ni. Nimina House pahniha rorel inkhawmah pawh eptu member-te an aubuai leh avangin chawhnu lamah ṭhutkhawm titawpin, vawiin chawhma dar 11 ah ṭhutkhawm hi chhunzawm a ni ang.

Thawhṭanni khan Lok Sabha-ah sawi hona awm loin Supreme Court judge tihpunna tur bill pass a ni bawk.

Rajya Sabha-a eptu hruaitu, Congress president Mallikarjun Kharge chuan Ram Mandir trust-a thawhlawm rua puhna lian tak awm chungchangah prime minister Narendra Modi chu House chhungah chhanna kimchang pe tura an phut thu a sawi. Speaker leh chairperson-te chuan hemi chungchang leh zirlaite chunga tharum thawhna thlengte sawi ho a nih ngei theih nan hun an hawng tur a ni, a ti

Congress MP Pawan Khera chuan nimina rorel inkhawmah zirlaite kut thlak an nih dante chu House-ah sawifiah turin union home minister Amit Shah an phut thu a sawi a, CPI (MP) John Brittas chuan Parliament session-a Prime Minister leh Home Minister-te an tel loh chhan a zawt bawk. Hetih lai hian BJP chuan eptu member-te chu House-ah aubuai reng leh, Parliament monsoon session neih mek pawh rorel mumal thei loa siamah an puh ve bawk.