IAF Chief-in ni thum cham turin Vietnam tlawh

India leh Vietnam inkar venhimna leh sipai inkara thawh dunna tihhmasawn tumna kal zelah, Indian Air Force (IAF) Chief, Air Chief Marshal A.P. Singh chu Thawhtanni khan ni thum cham turin Vietnam-ah a zin.

Singh hi Hanoi-ah Vietnam-a India ambassador Tshering W. Sherpa chuan lo dawngsawngin, Vietnam hruaitute nena meeting an neih hmain ram pahnih inkar inlaichinna leh inremna thar chungchangte a lo hrilhfiah hmasa a ni.

Air Chief Marshal Singh hian Vietnam Air Defence -Air Force Service Commander Lieutenant-General Vu Hong Son nen inremna leh thawh dunna thuthlung hrang hrang te sawi dun nghal a ni. Ram pahnih sipaite thawh dunna neih dante thlirletin, a bik takin boruak lama venhimna leh thawh dunna kawng thar sial dan tur te an sawi dun.

Indo-Pacific bial chhunga venhimna leh inlaichinna nghet zawk siam nan ram pahnih te hian Comprehensive Strategic Partnership hnuaiah sipaia thawh dunna hi tihchak chhoh zel an tum. Tun hnaiah India leh Vietnam te hian supersonic cruise missile 'BrahMos' indawrna tura inremna thuthlung an ziah fel thu defence secretary Rajesh Kumar Singh chuan a lo sawi tawh bawk.