FSSAI-in Dabur product zawrh chhuah khap

Ram chhunga ei leh in him tawk leh tawk loh endiktu, Food Safety and Standards Authority of India (FSSAI) chuan consumer-te mit la tura an product hrang hranga '100%' tih chhinchhiahna an hman avangin Dabur India Ltd-in ei tur leh in tur hrang hrang an zawrh chhuah chu hralh chhunzawm tawh lo turin khapna thupek a tichhuak. FSSAI chuan hetianga '100%' tih ziah lan hi dan kalh a nih thu an tarlang bawk.

FSSAI-in a khap zingah hian Dabur khawizu, apple cider vinegar, virgin coconut oil, sesame oil, cow ghee, coconut tui leh coconut milk-te an tel. Heng eitur hrang hrang a hmuna zawrh leh e-commerce platform-a zawrh chhuaha '100% Natural', '100% Pure', '100% Organic' leh '100% Purity Guaranteed' tia tarlante hi Food Safety and Standards (Advertising & Claims) Regulations, 2018 dan nen a inkalh a, mipuite rilru tibuai thei niin a tarlang.

Thuneitute tarlan danin, '100%' tia eitur chhinchhiah hi a fiah tawk lo a, a taka finfiah hleih theih loh a ni. 'Dabur Himalayan Organic Apple Cider Vinegar' leh 'Dabur Organic Honey' pawhin FSSAI phalna mumal awm loin 'Jaivik Bharat' logo an lo hmang a, hei hi dan bawhchhiatna lian tak a ni bawk.

FSSAI chuan tun hma lam pawhin Dabur hnenah hian hriattirna an lo thawn tawh ṭhin thu leh, siamṭha tura an tih hnuah pawh hmalakna mumal a awm loh avangin hetiang khapna hi chhuah a nih thu an sawi. Dabur hi he khapna thupek zawm a, ni 15 chhunga Action Taken Report (ATR) theh lut turin hriattir a ni. Dabur India Ltd chuan thuchhuah siam nghalin, FSSAI notice hi an hmuh tawh thu leh an website leh zawrh chhuahnaa ei tur tarlante chu ngawrh taka an endik mek thu an sawi.