Delhi Police vs Lawyer : Police-ten home ministry-ah report thehlut

New Delhi-a Tis Hazari court complex-a Delhi police leh lawyer-te inkara buaina chhuak chungchangah nimin khan Delhi police-te chuan union home  ministry hnenah report a thehlut. 

Home ministry official chuan report-ah hian Delhi police-te chuan thil thlen dan kimchang leh, action lak a nih dante an ziak tih a sawi. Police leh lawyer-te inkara buaina a chhuah ṭanna chu parking chungchang vang nia sawi a ni. 

Kar kal ta Inrinni khan Saket court pawn lamah lawyer rualte chuan police pakhat, bike-a chuang chu kut an thlak a, an kutthlak lai hi video camera-ah lak niin hei hi internet lamah a darh zui nasa hle. Police leh lawyer-te inkara buaina chhuakah hian mi 20 velin  hliam an tuar a, motor pawh eng emaw zat hal a ni bawk. 

Police pakhat kutthlak a nih avanga lungawi loin, nimin khan Delhi police headquarters kawtah police ṭhahnem tam tak pungkhawmin lungawi lohna an lantir. Lawyer-te chetdan an dem thu te sawiin, mipuite venhim hna thawktute chu venhim ngaiin an awm ta niin an sawi a, senior officer-te chu police zahawmna humhim tura hma la turin an phut tih an sawi.