Kolkata-ah India International Science Festival ṭan

Ni li awh tur, India International Science Festival (IISF) vawi ngana chu nimin khan West Bengal khawpui, Kolkata-ah ṭan a ni. 

Pirme minister Narendra Modi chuan nimin tlai dar 4 khan video conferencing hmangin he festival hi a hawng. Union Minister for Science and Technology, Earth Sciences and Health and Family Welfare, Dr. Harsh Vardhan chuan nimin khan festival hi a hmanpui a, Mega Science Exposition a hawng nghal bawk a ni. 

India International Science Festival hi sorkar laipuia Ministry of Science and Technology and Ministry of Earth Sciences leh Vijnana Bharati (VIBHA) ṭangkawpin an buatsaih a ni. Khawpui chhunga hmun hrang hranga he festival chhung hian conference, conclave leh exhibition te buatsaih a ni bawk ang. 

Kum 2015 aṭanga neih ṭan, India International Science Festival hi kumtina neih ṭhin a ni a, khawvela science festival lian ber a ni. He festival hi science leh technology chawilarna leh, science-in India ram tana hmasawnna a thlen theih dante lantirna hun atan hman ṭhin a ni. 

Kumin festival thupui atan RISEN India - 'Research, Innovation and Science Empowering the Nation' tih hman a ni.