Parliament buai tiziawm turin Rijiju-a'n Rahul-a inbiakna neih pui

Parliament Monsoon Session kal mekah sorkar leh eptute inkara inremna awm thei lo chinfel a nih theih nan, parliamentary affairs minister Kiren Rijiju chuan Ningani khan Lok Sabha-a Leader of Opposition Rahul Gandhi chu a pisa-ah inbiakna a neih pui.

Hruiatu pahnihte hi minute 50 vel a inkawm a, Delimitation Bill leh Foreign Contribution (Regulation) Amendment (FCRA) Bill, 2026 chungchang te an sawi dun a ni. Rijiju chuan Independence Day hnu lamah special session ko a, Women's Reservation Bill leh Delimitation Bill te pass tum nia thuthang awm chu hnawlin, sorkar lamin chutiang ruahmanna ansiam loh thu a sawi.

Rahul Gandhi chuan Rijiju hnenah hian House rorel tluang taka kal chhunzawmpui a nih theih nan union home minister Amit Shah-a'n NEET paper leak vanga zirlai lungawi lo, nawrh huaihawtte chunga police te chet dan leh Ayodhya-a Ram Temple donation rukbo chungchangah Parliament chhunga thuchhuah a siam ngei a ngai a ni, a ti.

Parliament rorel inkhawm ṭan a nih hnuah buaina hrang hrang vanga Parliament rorel a khaihlak fo a, rorel mumal thei loin member-te in auhbuaina avangin ṭhutkhawm tihtawp a ni fo a ni. Hei vang hian Lok Sabha leh Rajya Sabha-ah session ṭan a nih aṭangin rawtna leh zawhna pawimawhte sawi hona mumal tak pawh a la awm lo.