Meta hotupa Mark Zuckerberg-a’n ngaihdam dil

Social media giant, Meta chief executive officer (CEO) Mark Zuckerberg chuan an platform hrang hrang Facebook leh Instagram-a naupang tana him lo lam chi 'child sex abuse material - CSAM', deepfake content darh leh platform kaltlanga thil dik lo leh fel lo awmah India sorkar hnenah ngaihdam a dil tih sorkar official-te chuan an puang.

Meta CEO-in ngaihdam a dil thu hi Nilaini khan Meta-a global head of public policy Joel Kaplan-a’n New Delhi-ah Ministry of Electronics and Information Technology (MeitY) official-te leh Union IT Minister Ashwini Vaishnaw-te a hmuh hnuah puanzar a ni.

Parliamentary Standing Committee on IT chuan tunkar tir lam khan Meta hotute hi koin, prime minister Narendra Modi-a video post Facebook-a paih palh a nih chungchang leh platform-a thil dik lo darh chungchangah chhui zui an nih tur thu leh, ngaihdam an dil loh chuan Section 79 hnuaia 'Safe Harbour' zalenna hlihsak an nih tur thu an hriattir.

Joel Kaplan chuan thuchhuah siamin, PM Modi-a video post tihsual palh avanga paih a nih chungchangah Meta aiawhin IT Minister hnenah ngaihdam a dil a ni. Mahse, official-te chuan Meta hotute hi koh nawn lehnain a la hmuak dawn tih sawiin, platform enkawltuten mimal post tihdarh nana sum hmanga puihna, 'paid promotion' an neih te, CSAM leh fake news an khap tawk loh avangin Section 79 hnuaia zalenna an hmuh ṭhin chu hlihsak an hmabak reng tih an tarlang.