Ramri enkawlna chungchangah India leh China inbia

India leh China chuan ramri, Line of Actual Control (LAC)-a thil thleng te thlirletna neiin, ramri chin bithliah a ramri enkawl zui dan leh ramri piah lama thawh dunna tur chungchanga chipchiar taka inbiakna an nei. India chuan ramri kaltlanga luang lui chungchanga expert-level mechanism meeting pawh neih thuai a ṭul thu leh, upstream project hrang hrang te technical details inthleng tawn tura rawtna a thlen bawk.

Inbiakna hi Working Mechanism for Consultation and Coordination on India-China Border Affairs (WMCC) framework hnuaiah New Delhi-a neih a ni a. India aiawh hi Ministry of External Affairs (MEA) Joint Secretary (East Asia) Sujit Ghosh-a'n a kaihruai a, China aiawh hi an Foreign Ministry-a Director General (Boundary and Oceanic Affairs Department) Hou Yanqi-i'n a ho thung. Ram pahnih palaite hian tun hnaia Special Representatives inbiaknaa thutlukna siam tawh te bawhzuiin thil tam tak an sawi ho a ni.

MEA chuan thuchhuah siamin, ramri chhehvela remna leh muanna a awm zui zel chu ram pahnih inlaichinna ṭha siamna atan thil pawimawh ber a ni tih a tarlang. Ram pahnih aiawhte chuan LAC a thil hriat sual leh inhmuh thiam lohna awm loh nan leh harsatna awm mek te chingfel turin diplomatic leh sipai lama inbiakna ruahmansa -WMCC leh local commander level meeting-te pawh telin chhunzawm zel an remti bawk.