Lok Sabha-in sawi hona awm loin MSME Amendment Bill a pawm

Lok Sabha chuan nimin Zirtawpni khan eptu member-te au buaina leh duh lohna lantir karah sawi ho awm loin Micro, Small and Medium Enterprises Development (Amendment) Bill, 2026 a pawm. He bill hi Rajya Sabha chuan August 3 khan lo pawm tawhin, Lok Sabha-in a pawm ve leh tak avangin president pawmpui hnuah dan puitling a ni dawn ta a ni.

Bill hi ram chhunga sumdawnna leh enterprise-te enkawlna, MSME sector-ten ba inpek tlai leh sum dinhmuna harsatna an neih mekte sukiang tura duan a ni. Administrative structure tihchangtlun leh inbiakremna kalphung fel zawk siam a nih theih nan ruahmanna thar an siam a ni. Sum ba chungchang a rang lama chinfel a nih theih nan hun bituk a ni a; court-a thlen a nih pawhin, thutlukna thar siam a nih hmain leibatute chuan an bat zawng zawng zat aṭanga 50% aia tlem lo tal an pek luh nghal a ngai tawh ang.

MSME sector hian India ram GDP-ah 31% an thawh a, thil siam chhuahna (manufacturing)-ah 36% leh ram pawna thil thawn chhuah (exports)-ah 41% an pui a ni. MSME minister Jitan Ram Manjhi chuan MSME-te hnena pek hi kum 2014-15-a Rs vbc nuai 10 vel ni ṭhin kha tunah chuan Rs vbc nuai 38.35 aia tam a tling tawh tih a sawi.