Aviation lam venhimna turin CISF leh IIT Ropar thawk dun dawn

Ram chhunga airport leh aviation infrastructure pawimawhte cyber attack laka humhim a, a hmuna venhimna hnathawhte tihchangtlun a nih theih nan Central Industrial Security Force (CISF) leh Indian Institute of Technology (IIT) Ropar te chu an thawk dun dawn. Hemi chungchangah hian IIT Ropar Director Prof. Rajeev Ahuja leh CISF Sector-I (Delhi Airport) Inspector General Senthil Avoodai Krishna Raj S- te chuan inremna thuthlung (MoU) an ziak fel tawh a ni.

Inremna hnuaiah hian CISF sipai thlan chhuahte chu kar ruk chhung a thlawna cyber security training pek an ni ang. He training hi IIT Ropar-a SCALE Foundation leh CISF-te institutional partnership hmanga kalpui a ni dawn bawk.

Training hian a tum ber chu CISF chhunga cyber security lam thiam bik 'specialised cadre' puitling siam chhuah a ni. Training chhung hian cyber attack leh harsatna lo thleng tur lo hriat lawk dan te, rang taka chhan let dan te, cyber beihna chhui zui dan leh airport enkawlna hna buai loa chhunzawm zel theih dan te zirtir an ni ang.

Official thuchhuah tarlan danin, airport leh a kaihhnawihte hi ram venhimna leh sum leh pai dehchhuah kawnga infrastructure pawimawh tak an nih avangin, cyber attack tawk palh ta se ram dinhmun leh sum leh paiah nghawng lian tak a nei thei a ni. Chuvangin, hetiang hmalakna hi airport venhimna tihchangtlunna atan a pawimawh hle tih an tarlang.