Canada-in thla 6 chhungin India mi 3,323 thawn kir

Canada sorkar chuan kumin 2026 kum chanve (January – June) chhung khan India mi leh sa 3,323 te chu India-ah a thawn kir tawh a, hei hi US sorkarin India mi a thawn kir zat aiin a let thumin a tam zawk. Canada Border Services Agency (CBSA) data tihchhuah thar bera a lan danin, kumin thla ruk chhunga India mi thawn haw tawh zat hi kum 2025 chhunga India mi 3,779 thawn haw aṭangin 88% a tling pha.

Kum 2025 kha Canada-in kum khat chhunga India mi a thawn haw tam ber ṭum a lo ni tawh a, tuna a thawn haw dan enin kumin hian a khum rin a ni. India External Affairs Ministry data chuan kumin January 1 aṭanga July 22 inkarah US chuan India mi 1,273 a thawn haw a tarlang a; US-in kumin thla sarih dawn chhunga a thawn haw zat aia tam hi Canada hian thla ruk chhung lekin a thawn haw hman a ni. Kumin kum chanve chhungin Canada-in ram dang mi leh sa a thawn kir zingah India mi an tam ber a, kum nga chhung a zawna thawn kir tam ber ni ṭhin, Mexico mite an khum tawh.

Canada sorkar hian ram pawn mi zirlai awm zat leh, thawktu hmun dang aṭanga lut zat tihniam turin a ram luh dan awlsam lutuk a titawp chho mek a, ramchhunga awm zui phalna nei lote zawn chhuah hna a kalpui mek bawk. Ram dang mite thawn chhuah an nih chhan hi visa fel lo, awm zui phalna dilna hnawl, visa leh ram dan zawm loh vang te a ni hlawm. CBSA record-a a lan danin, thawn chhuah hmabak zingah India mi 7,669 te an la awm bawk a, hei hi ram dang mi leh sa zingah a tam ber an la ni phak a ni.