I-Day lawmnaa venhimna kalpui dan tur Delhi police-in ruahman ṭan

Delhi police-te chuan kumina Independence Day vawi 80-na lawmna neihna tur, Red Fort-a venhimna hrang hrang kalpui dan turte an ruahman ṭan. Red Fort leh a chheh velah hian security agency hrang hrang aṭangin mi 15,000 aṭanga 20,000 bawr venhim hna thawktu dah tum a ni. Hei bakah hian a ṭum khatna turin 'Abhigyaan' app bakah venhimna ṭha zawk a awm theihna turin Facial Recognition System (FRS) hman tum a ni bawk.

Delhi police Deputy commissioner North Raja Banthia chuan venhimna hna thawk tur hian Delhi Police, paramilitary forces, National Security Guard (NSG) leh agency dang aṭanga ruat chhuah a nih thu a tarlang. CCTV tinte chu video analytics leh FRS hmanga thuam chak a ni dawn a, hemi hmang hian hmun hla tak aṭang pawhin mi hmel a thliar hrang thei dawn a, rinhlelh leh pawikhawihnaa lo inhnamhnawih tawh leh thubuai nei tawhte pawh a hriat zung zung theih dawn a ni.

FRS hman tur database-ah hian tun hnaia thubuai nei mek mi nuai thum dawn nihna kimchang leh hriat hran theihna tur dah sa niin, mihring punkhawm tam deuhna hmunahte uluk leh zuala thlithlaina atan hman a ni ang. Hei bakah Abhigyaan app hmang hian police-te chuan criminal record neite biometric verification hmangin an hre thei dawn a, man tawk tawhte record kimchang an hre thei bawk ang.

Delhi police chuan venhimna technology thar hrang hrang nen Red Fort chu thlithlai reng a nih tur thu sawiin, thawktu tam tak nen venhimna him tawk tak kenkawh tum a nih thu an tarlang.