Central health institution 28-ah post ruak 23,000 aia tam awm: Health Ministry

Parliament-a CPI(M) MP V. Savidasan zawhna chhangin union health minister Anupriya Patel chuan, ram chhunga central health institution 28-ah hna ruak 23,000 a awm mek tih a tarlang.

Health Ministry data tarlan danin, heng hna ruak 23,000 zinga a tam zawk hi doctor, teaching faculty, nursing staff leh paramedical support staff hnate an ni. Hna ruak tamna zingah All India Institute of Medical Sciences (AIIMS) hmun hrang hranga mi te, Delhi-a Safdarjung Hospital, Dr. Ram Manohar Lohia (RML) Hospital leh Lady Hardinge Medical College te an tel.

Heng hna ruak zinga 2,000 aia tam hi faculty leh senior doctor hmun ruak an ni a, nursing support leh paramedical staff-ah hna ruak sang tel a awm bawk. Teaching faculty leh doctor hmun ruak a tam hian medical zirlaite zirtirna chungchangah leh damdawi-in a damlo enkawlna kawngah harsatna leh indaih lohna lian tak a thlen mek a ni.

Health ministry chuan chhan hrang hrang — pension-a chhuak, hna bansan leh hnaa kaisan vanga hna ruak hi tam a nih thu a sawi. Sorkar laipui chuan heng hna ruakte hi rang taka hnawhkhat a nih theih nan Union Public Service Commission (UPSC), Staff Selection Commission (SSC) leh AIIMS recruitment cell-te hmangin recruitment process kalpui mek a nih thu leh, direct recruitment bakah contract basis pawhin hna hi hnawhkhat tura hma lak a nih thu a tarlang bawk.