Trump leh Modi-ten Russia hrekna harsatna an chingfel ang – US official

Russia aṭanga crude oil lei avanga US-in chhiah 100% thlenga tihsana a vauna aṭanga harsatna awmchu ram hruaitu pahnih, Donald Trump leh Narendra Modi-ten an chingfel thei dawn tih White House senior adviser Peter Navarro chuan Thawhlehni khan a sawi.

US Senate chuan a hma lawkin US President chu Russia oil lei nasa ram pangate lakah chhiah 100% a tihsan remtihna bill a lo pass tawh a ni. Russia oil an leina sum hi Ukraine dona atan Russia an puihna a ni nghal niin an sawi a ni.

Peter Navarro chuan Thawhlehni khan thuthar thehdarhtute hnenah hnenah India chuan kum 2022-a Russia-in Ukraine a run hma kha chuan Russia oil a leisak ngai mang lo tih a sawi. Mahse, indona a chhuah hnuah India chuan Russia oil lei belhin oil thlitfim hralh chhawngtu lian berte zinga mi a, hemi hian Russia chu induna atana mamawh sum a pekna remchang a ni tih a sawi.

Navarro chuan India-in Russia oil a leina tam tak a tlahniam ta hret hret nia sawiin, "President leh India Prime Minister-te hian hnathawh hona ṭha tak leh inzawmna nghet tak an nei a ni, Hetiang harsatna awm mek pawh hi anmahni ngeiin an inkarah an chingfel thei dawn," a ti.