Parliament rorel a ṭiak ta, productive loh chhanah sorkarin Congress puh

Parliament Monsoon Session chu Ningani khan aṭiak fel ta, he session chhunga hna thawh puitlin 'productivity' zat chu Lok Sabha-ah 19% leh Rajya Sabha-ah 39% chauh a ni. Union parliamentary affairs minister Kiren Rijiju chuan hna thawh puitlin zat a hniam hle tih sawiin, a chhan chu eptu party-te, a bikin Congress party-ten buaina an siam fo vang a ni tiin a chhuahchhal.

Press conference-a a sawinaah minister Kiren Rijiju chuan, sorkar lamin Parliament chhungah thil chi hrang hrang sawi ho a duh reng laiin eptu lamin sawi ho pumpelha buaina siam a, Session tibuai zawnga an che zel chu pawi a tih thu a sawi. Monsoon Session chhung hian Bill 12 pawm a ni a, amaherawhchu, heng zinga pakhat chauh hi House hnihah a hranpaa sawi ho a ni.

Parliament Monsoon Session hi July 20 aṭang khan ṭan a ni a, NEET examination paper leak leh Ayodhya Ram Mandir donation chungchanga thil dik lo thleng nia puhna bakah, zirlai lungawi lote chunga police-te chet dan avangin Parliament session chhung zawng chu Session buai tak a ni chhunzawm ta a ni.

Opposition Leader Rahul Gandhi chuan zirlai lungawi lote chunga police-ten hmanrua an hman chungchangah sorkar laipui chhuahchhalin, union home minister Amit Shah ban a phut thu a sawi zui bawk. Sorkar lamin NEET chungchanga inbiakna neih a inpeih thu sawi mah se, opposition party-te chuan an thil phut an nawr zui zel avangin Parliament kawt leh a chhung lamah buaina a chhuak nasa hle a ni.