I-Day pualin Rashtrapati Bhavan-ah hnam nun leh zai/lam entir a ni dawn

Independence Day lo thleng tur pualin, president chenna leh office ni bawk Rashtrapati Bhavan-ah Independence Day Reception ‘At Home’ ah India ram a hnam hrang hrang te lam leh rimawi entirna lian tak buatsaih a ni dawn. Kumin Independence Day reception-ah hian state pali—Chhattisgarh, Goa, Madhya Pradesh leh Maharashtra te hnam zai leh lam entir tur atan thlan an ni.

He hunah hian state pali aṭangin artist 35 vel zet ten hnam lam leh rimawi hrang hrang an entir dawn a ni. Entirna hrang hrang zingah hian Maharashtra 'Lavani' leh 'Songhi Mukhawate', Chhattisgarh 'Gedi' leh 'Gaur Madiya', Madhya Pradesh 'Bhagoria' leh 'Baiga Karma', chutiang bawkin Goa 'Samai' leh 'Ghode Modni' te an tel a ni.

Hnam zia entirna leh rimawi hrang hrang te hi Chhattisgarh folk artist Rakesh Kumar Tiwari, Sangeet Natak Akademi Award dawngtu chuan a duang a ni. Rampal, khawpui leh tuifinriat kam thlenga entirna te tarlangin ram pali aṭanga kalkhawm ten he hun hi thawhhona lian takah an chantir dawn.

Lam leh rimawi mai bakah, dawhkan cheina textile aṭanga eitur thlengin tualchhung zia tilang thei turin Bagh Print, Khunn, Kunbi leh Soura te hman a ni ang a; Indori Poha, Patoleo, Mini Farra, Bafauri leh Kodo Millet Kheer te thlengin khualte chhawp chhuah a ni ang.