Independence Day vawi 80-naah theme pahnih awm dawn

Independence Day vawi 80-na chu vawiin hian ramchhung hmun hrang hrangah ropui taka lawm a ni dawn. A lawmna pui ber hi Red Fort, New Delhi-ah neih a ni dawn a, kumin hian theme pahnih ‘Yuva Shakti for Viksit Bharat@2047’ leh '150 Years of Vande Mataram' hman a ni dawn a ni.

Kumin Independence Day lawmnaa thupui pahnih hman tur zinga pakhat zawk '150 Years of Vande Mataram' hi Bankim Chandra Chattopadhyay phuah, India zalenna sualnaa hla pawimawh tak 'Vande Mataram' kum 150 tlinna pual a ni. A pakhat zawk, ‘Yuva Shakti for Viksit Bharat@2047’ hi India ram zalen aṭanga kum 100 tlinna tur kum 2047-a mahni kea dinna tura ṭhalaite thiltihtheihna leh mawhphurhna pawimawh tak lantirna a ni bawk.

Prime minister hmasa ber Jawaharlal Nehru khan August 15, 1947 khan historic 'Tryst with Destiny' thuchah sawiin Red Fort-ah hnam puanzar a pawt parh a, hemi aṭang hian Independence Day-ah kum tin Red Fort-ah Prime Minister ten hnam puanzar pawt pharhin ram mipuite hnenah thuchah an sawi ṭhin. Kumin hian Red Fort, New Delhi-ah Prime minister Narendra Modi-a'n hnam puanzar pawt pharhin ram mipuite hnenah thuchah a sawi leh dawn a ni. PM thusawi hi AI hmangin Digital India Bhasini kaltlangin regional language 22 in tihchhuah a ni bawk ang. Modi hian a zawna Independence Day thuchah a sawi kum 13-na tur a ni. PM zingah amah aia a zawna I-day thuchah sawi ngun ber chu Jawaharlal Nehru chauh niin, ani hian a zawnin kum 17 thuchah a sawi a ni. I-Day nia Modi thusawi rei ber chu kum 2025-ah khan niin, minute 103 chhung a sawi.

Vawiina Red Ford-a Independence Day lawmna neih turah field hrang hrang aṭangin sawm bik, mi 5,000 an awm a, heng mite hi ram chhung hmun hrang hrang amite an ni. A lawmna hmunah hian mi 27,000 vel tel tura chhut a ni bawk. Red Fort leh a chhehvelah venhimna pawh khauh taka kalpui niin, AI-based CCTV camera pawh 1,000 chuang dah a ni. Security agency-te pawhin venhimna kalpui danah a hmain mock drill te pawh an lo nei lawk vek a ni.

Mi 1057 hnenah Gallantry leh Service Medals hlan dawn

Independence Day pualin ram chhung venhimna kawnga hna thawk ṭha mi 1,057 hnenah chawimawina medal hlan a ni dawn tih Union Ministry of Home Affairs chuan nimin khan a puang. Heng chawimawina te hi Police, Fire Service, Home Guard & Civil Defence leh Correctional Services thawktute hnenah hlan a ni ang.

Medal for Gallantry (GM) mi 301 hlan a ni dawn a, heng zinga 272 hi Police personnel niin, 29 hi Fire Service thawktu an ni. Gallantry Medal dawngtu zinga 197 hi hel awmna 'Left Wing Extremism' biala thawk an ni a, Jammu & Kashmir aṭangin mi 51, hmarchhak aṭangin mi 12 leh bial dang aṭangin mi 41 te hlan an ni ang.

President's Medal for Distinguished Service (PSM) chu mi 92 hnenah hlan a ni dawn bawk a; heng zinga 83 hi Police, 4 hi Fire Service, 3 hi Civil Defence & Home Guard leh 2 te hi Correctional Service thawktute an ni. Heng bakah Medal for Meritorious Service (MSM) chu mi 664 hnenah hlan a ni dawn bawk. MSM dawngtu zinga 606 hi Police niin, 28 hi Fire Service, 18 hi Civil Defence & Home Guard leh 12 hi Correctional Services thawktute an ni.