Venezuela-a hna thawh chhunzawm leh turin ONGC-in US phalna hmu

India ram sorkar hnuaia oil leh gas lai chhuaktu company, Oil and Natural Gas Corporation (ONGC) chuan South America-a Venezuela ramah an hnathawh zawng zawng chhunzawm leh vek phalna chu United States Treasury Office of Foreign Assets Control (OFAC) hnen aṭangin an hmu leh ta. Hemi chungchang hi ONGC Director-Finance Anupam Agarwal chuan investment thuchhuah an siamnaah a tarlang a ni.

US sorkarin Venezuela chunga hrekna a lo hman tawh vanga harsatna hrang hrang awmte chu hlipin, licence thar hi pek an ni. ONGC chuan Venezuela-a kum tam tak chhung an lo thawh tawhte chu rang zawk leh lian zawkin a chhunzawm leh thei dawn ta a ni. ONGC Videsh Ltd (OVL) hian Venezuela-a San Cristobal oil project-ah 40% stake a nei a, Carabobo project-ah 11% stake a nei bawk.

Licence thar a hmuh tak avang hian ONGC chuan sum leh pai harsatna an tawhte chinfel a nih a, hman aṭanga sum tang USD mtd 500 aia tam chu hmuhchhuah leh vat an beisei. Venezuela sorkar leh tualchhung joint-venture partner PDVSA te nen inremna thar siam, project te chu tam zawk enkawl a tum a ni.

Venezuela hi khawvel pumah crude oil ngah ber ram a ni a, OPEC chhinchhiah danin barrel maktaduai 303,000 zet a nei a ni. India ram tana oil mamawh tam tak awmte awlsam zawnga lakchhuah leh hnianghnar zawka hmuh a nih theihna tura ONGC hmalakna hi ram pahnihte thawh dun chhunzawm zelna atana thil pawimawh tak a ni dawn bawk a ni.