FSSAI hriattirna thlen company 6 in tihlawhtling tawh

Ram chhunga ei leh bar endiktu, Food Safety and Standards Authority of India (FSSAI) hnen aṭanga hriattirna an hmuh hnuah ei leh bar siam chhuaktu company, Food Business Operators (FBO) company parukte chuan mipui hruai sual thei fakna leh trademark an hman ṭhinte an siamṭha tawh tih FSSAI chuan Pathianni khan a puang.

FSSAI thuchhuah tarlan danin, company hrang hrangte hian bungrua packaging leh a kawra label an tarlanah mipui hruai sual thei fakna hrang hrangte chu an paih tawh tih sawiin, danin a phut angte zawm turin hmalakna thar an siam zui nghal a ni.

Bumna ṭawngkam siamṭhatu company-te zingah Livyor Ventures Pvt. Ltd. pawh a tel a, an thil thar chhuah 'Livyor Roasted Edamame Beans' chungchangah 'vegan' leh 'healthy' tih ṭawngkam hmanna chu dan an hriat chian tawk loh vang a ni tiin ngaihdam an dil. Pack-na hlui zawng zawng pawh tihchhiat nghal a ni tura hma lak a nih thu FSSAI an hrilh a ni.

Heng bakah hian Honest Innovations For You Pvt. Ltd. leh Heliostone Specialities Pvt. Ltd. te chuan an trademark hmante an thlak a, Rajasthan Agro and General Industries leh Iota Nanotechnology Pvt. Ltd. te pawhin dan kalha hriattirna an tarlante leh tui thianghlim tawk lo an siam ṭhinte an tihtawp thu an tarlang bawk. Panchamurtha Industries Pvt. Ltd. pawhin an website aṭangin an electrolyte drink siam pawh an thai bo nghal a ni.

FSSAI chuan tun hnai thla eng emaw zat kalta aṭang khan FBO hrang hrang lakah dan hmangin hmalakna a kalpui ṭan a, dan zawm lo an man chhuahte chu hriattirna leh warning an pe zui zel bawk a ni. Hei bakah hian energy drink siamtute leh alcoholic beverage siam chhuaktute dap chhuah hna an kalpui bawk.