Delhi lawyer-ten lungawi lohna lantir ve leh

Delhi Police leh lawyer-te inkara buaina a chhuah hnuah, Thawhlehni khan Delhi Police-te leh an chhungte chuan police headquarters kawtah lawyer-te chet dana lungawi loin nawrh an huaihawt. Hemi hnu, nimin khan lawyer-te chu district court pahnih pawn lamah pungkhawmin lungawi lohna an lantir ve leh. 

Lawyer-te hi Rohini leh Saket district court bulah kal khawmin, an lungawi lohna an aupui ve leh a ni. Court chhungah luh tum mah se an luh phalsak an ni lo. Bar Council of India chuan lawyer-te chu an nawrh titawp turin ngen mah se, All Bar Associations coordination committee chairman Mahavir Sharma chuan nimin khan lawyer-te hian hna an la boycott tih a sawi. 

Mahavir Sharma chuan lawyer rualten police pakhat kut thlak nia sawi vanga Thawhlehnia police rualten nawrh an huaihawt chu a dem thu a sawi a, police officer thil dik lo titute chu hrem an nih hma chuan lawyer-te chuan nawrh an chhunzawm zel dawn tih a sawi a ni. Mahavir chuan, "Thawhṭannia Saket court pawna lawyer-ten police officer kut an thlak nia sawi chungchang hi dik taka chhui chian kan duh a ni. Rorelna dik tak kan hmuh hma chuan kan nuar zel dawn," a ti. Delhi police te chu thil dik lo titu dik tak, an senior-te dik lohna thup tuma boruak dang siamah a puh. An buaina chhuah ṭan ni, November 2-a lawyer-te lam hawia silai hmetpuaktu, police laka action la ngei tura an phut thu an sawi bawk.