NC party-in an hruaitute chhuah turin ngen

Jammu and Kashmir political party, National Conference chuan party hruaitu, pawn chhuak thei loa hren mekte chu chhuah turin sorkar laipui an ngen.

NC chuan J&K special status Article 370 hlih a nih ruala political leader hren zuite chu November 5 kha a thla thumna chiah a nih thu thuchhuah siamin, chhuah tawh turin sorkar laipui chu an phut a ni. Kashmir-ah hian Artice 370 tihtawp a nih aṭanga ni 90 a vei hnu pawhin internet leh inbiakpawhnate khuah­khirh a la ni a, heng avangte hian Kashmir-a sum­dawngten harsatna an tawk a, chhungkaw hrang hrangin ramdang leh state danga an chhungte be pawh ṭha thei loin harsatna an tawk a ni.

NC hruaitu hlui leh J&K chief minister hlui ni bawk Farooq Abdullah leh Omar Abdullah-te chu la hren chhunzawm an ni a, anni bakah hian CM hlui tho Mehbooba Mufti pawh hren reng a la ni tih  National Conference thuchhuah chuan a tarlang. Party hruaitute chhuah tura an ngen bakah, zirna inte chu hawn thuai a nih tur thu an sawi hnua, an la hawn loh vangin sorkar laipui an dem thu National Conference chuan a tarlang bawk.