Ramri hrul state 6 leh UT 2-a DC-te khua leh tui nihna pek theihna thuneihna pe

Union Ministry of Home Affairs (MHA) chuan ramri hrula state paruk leh Union Territory (UT) pahniha District Collector (DC)-te hnenah India khua leh tui ni theite hnena khua leh tui nihna pek theihna tura thuneihna a pe.

Home Ministry-in 'Citizenship (Third Amendment) Rules, 2026' a tihchhuah zulzuiin, Gujarat, Rajasthan, Punjab, West Bengal, Assam leh Tripura tribal area tel lo leh Union Territory pahnih Jammu & Kashmir leh Ladakh-a DC-te chuan registration leh naturalisation hmanga citizenship dilna endik leh pawm theihna an nei tawh dawn a ni. Assam leh Tripura-a tribal area erawh a huam lo.

Heng dilnate hi tun hma chuan Empowered Committee-ten an endik ṭhin a, hei hian dilna a tihkhawmuan ṭhin avangin committee-a dilna pending awm mekte pawh DC-te hnenah transfer vek tura hriattir an ni.

He kaihhruaina tharah hian citizenship dil duhten online portal-ah dilna Form IX hmangin an theh lut ang a, DC-ten document enfiahin khua leh tui an nih theih dante an zirchiang ang. Diltuten thutiam, Oath of Allegiance an lak hnuah khua leh tuia pawm tlak ngei an ni tih DC-in a pawm chuan citizenship a pe chhuak thei dawn a ni. Mimala inlan duh lo leh thutiam la lo chu an dilna hnawlsak a ni ang.