FM Sitharaman kaihhruaiin India aiawhten Singapore PM Lawrence Wong kawm

Union finance minister Nirmala Sitharaman hruaina hnuaiah India aiawh ministerial team chuan Singapore prime minister Lawrence Wong chu nimin Ningani khan The Istana, Singapore-ah an kawm a, ram pahnihte thawh dunna leh sumdawnna tihchak chhunzawm dan turte an sawi ho.

Ministerial delegation-ah hian external affairs minister S. Jaishankar, commerce and industry minister Piyush Goyal leh minister of state for electronics & IT Jitin Prasada te an tel. Singapore-a August 19-20, 2026 chhunga '4th India-Singapore Ministerial Roundtable' (ISMR) leh India-Singapore Business Roundtable neihah an tel a ni.

Finance Ministry chuan ram pahnih hruaitute hian Comprehensive Strategic Partnership hnuaia hmasawnna hrang hrang advance manufacturing, sumdawnna, digitalisation, connectivity, skill development leh sustainability kawnga thawh hona tihchak zel dan turte an sawi ho thu social media platform X-ah an tarlang.

ISMR hi kum 2022 a din niin, India leh Singapore inkar thawh dunna leh sumdawnna tihchakna atana pawimawh ber pakhat a ni. Financial year 2025-26 chhung khan Singapore hi India-a Foreign Direct Investment (FDI) titu lian ber a ni a, USD tld 19.8 vel a invest a ni. Ram pahnih inkar sumdawnna pawh FY2004-05-a USD tld 6.7 vel aṭangin FY2025-26-ah USD tld 36.1 ah a ṭhang chho bawk.