Congress-in E20 policy ennawn turin sorkar laipui a phut

Prime minister Narendra Modi kaihhruai sorkarin E20 petrol, petrol-a ethanol 20% pawlhna tur policy a kalpui chhoh mek chu Congress party chuan duh loin, ennawn turin sorkar an phut. Sorkar thutlukna siam chuan hmun hrang hrangah harsatna a thlen mek tiin an sawisel.

Congress general secretary Jairam Ramesh chuan social media platform X-ah thuchhuah siamin, petrol-a ethanol pawlh tur siamna atan fu leh buh tam tak hman a nih tak avangin nitin mamawh ei leh bar man a sang dawn hle a ni, a ti. Hei bakah lirthei eng emaw zat tan he fuel hi a him tawk lo a, mileage a tichhiain lirthei engine a tichhe hma tiin a tarlang bawk.

Jairam Ramesh tarlan danin, mi retheite ei in tur buh hi ton vaibelchhe 2.5 vel ethanol siam chhuah nan hman a ni a, hmun hrang hrangah kurtai, buh leh eitur dangte an to phah hle a ni. Chini man a to bakah, kurtai, buhfai leh maida thlengin thla thum chhungin chawhrualin 11% in a pung a, thil man to hian kawng hrang hrangin mipui tan phurrit lian tak a thlen chho mek a ni.

Congress hruaitu hian khawvel huapa raw oil man tlakhniam laia petrol man hniam si lo te, ethanol pawlh a nih vanga thil man tlawm zawk tura beisei a nih laia mipui hnen a thlen phak si loh chhan sorkar a zawt bawk. Ramesh chuan mipuite tan ethanol pawlh loh fuel thlan tur a awm reng a pawimawh tiin E20 policy hi sut a, ennawm leh nghal ngei a phut a ni.