Mahatma Gandhi-a kutziak note Rs vbc 16.20-in hralh

India tana zalenna sualtu Mahatma Gandhi-a kutziak lehkha pawimawhte chu Saffronart auction house-in lilamna an buatsaihnaah Rs vbc 16.20 in hralh a ni. India rama hmun hlu leh chanchin hlui nei lehkha pawimawh, histolrical document lilam tawh zingah a man to ber record thar a siam.

Lilamna hi ‘Gandhi: From the Collection of Anand T Hingorani’ tiha buatsaih niin, Gandhi-a’n kum hnih chhunga nitina a ziahsak ṭhin a ṭhian hnai Anand T Hingorani hnena a thuchah leh a rilru hahdamna tura a ziaksak ‘A Thought for the Day’ tiha sawi chu an thil hralh zinga thawh hlawk ber a ni. Hingorani hi a nupui Vidya-i'n a thihsan hnuah Gandhi-a hian thlarau lam chakna leh thlamuanna pe turin hêng thu hi nitina ziaksakin a thawn ṭhin a ni.

Saffronart official-te tarlan danin, Gandhi-a thuchah ziahte hi India ram chhunga mi pakhatin a lei a, he lehkha pawimawh leh hlu takte hi ram chhungah ngei a awm zui zel dawn a ni. Lilamnaah hian Gandhi-a thil hman ṭhin hrang hrang leh a thlalak te pawh man to tak takin mi hrang hrangin an lei bawk.