September-ah ram pum huap ruhhlo do beihpui thlak kalpui dawn

Ram pum huap ruihhlo do beihpui 'anti-narcotics campaign' chu kum khat chhung thla tin kar hnih chhung nei tur leh, kawng hrang hrang 24a beihpui thlak turin Narcotics Control Bureau (NBC) chuan state tina agency hrang hrangte a hriattir. NCB chuan central agency leh State/UT hrang hranga Anti-Narcotics Task Force (ANTF) te hnenah lehkha thawnin, ruihhlo do beihpui thlakna hi nakkum August thlenga kal pui tur hian a chah a ni.

Zirna in - primary leh college thlenga zirlaite tan August 16 aṭang khan inzirtirna neih ṭan a ni. September thla aṭang chuan enforcement action pangngai neih ṭan a ni thung ang. A tir kar hnih chhungin ruihhlo kaihhnawiha man tawk leh thubuai nei, ram pawn mi zawn chhuah leh mante thawn kir tur zawn hmasak a ni ang a, a dawt leh kar hnihnaah ruihhlo hmanga eizawnnaa inhnamhnawihte man chhuah beihpui kalpuina neih chhunzawm a ni ang.

October thla aṭangin NCB leh state ANTF team-te chuan drug controller-te nen ṭangkawpin damdawi dawr leh pharmacy hrang hrangte chu an dawrah ngei enfiahna an nei dawn a ni. Hei hi damdawi pangngai, pharmaceutical drugs ruihhlo atan leh tawlh ruk atana hman sual a nih lohna tura hmalakna tur a ni.

Sorkar hnuaia agent-te pawh darknet, cryptocurrency leh synthetic drugs siamna laboratory rinhlelhte chhui zuina atan training bik pek an ni bawk ang.