India leh China-in ramri buaina chinfelna kawng dap zui zel

Prime minister Narendra Modi leh China President Xi Jinping te inbiakna lo neih tawh kaltlanga, ram inlaichinna leh ramri buaina chinfelna atana kawng dik an zawh chhoh mekah , ram pahnih inlaichinna chu a pangngai chho leh mek tih National Security Advisor (NSA) Ajit Doval chuan Beijing-a China Foreign Minister Wang Yi a kawm ṭumin a sawi.

Beijing-a Special Representatives (SR) inbiak vawi 25-naah hian ram pahnih te chuan ramri Line of Actual Control delimitation hmalakna te, border management tihchangtlun leh ramri-a muanna thlen chhunzawm zel dan tur te ngunthluk takin an sawidun a ni. NSA Doval leh Foreign Minister Wang Yi te hian hmaichhanah inbiakna hlawhtling tak an nei bawk.

Indian Embassy leh China Foreign Ministry thuchhuah siam a tarlan danin, ram pahnih te hian bilateral cooperation huang zauh zel an tum a. Ramri buaina chinfel nan 2005 Political Guiding Principles behchhanin, mutual respect leh mutual understanding nen diktak leh ram pahnih ve vete in lungrualna hmanga chinfelna kawng zawn chhunzawm an tum thu an tarlang.

Ajit Doval chuan inlaichinna a ziaawm chho hi ramria muanna a awm zel vang a ni tih sawiin, New Delhi-a BRICS Summit awm tur atan pawh he inbiakna hi a pawimawh hle tih a sawi. BRICS Summit-ah hian China president Xi Jinping chu kum 7 hnua a vawikhatna atan India-ah a rawn zin beisei a ni bawk.

China Foreign Minister Wang Yi chuan India leh China inlaichinna chu khawvel huap pawha pawimawh a nih thu sawiin, 'Dragon-Elephant Dance' a thlen theih nan leh thawhhona ṭha neih zui zel nan hma lak an inhuam thu a sawi bawk.