US hrekna karah India-in buh Iran-ah thawn chhunzawm dawn

United States-in Iran laka sumdawnna kawng hrang hranga khuahkhirhna leh hrekna a tichhuak chungin, India chuan Iran hnena buh thawn chhuah chhunzawm zel a tum tih an tarlang.

Fiscal year liam ta khan India chuan Iran hnenah USD tld 1.25 hu thil a thawn chhuak a, heng bungraw thawn hmun thum a ṭhena hmuna hnih zet hi buh a ni. Iran hian tualchhung ei tur atana a mamawh a nih vangin India aṭang hian buh ton maktaduai 1 aia tam a la lut a, a hma kum aiin 17% in a sang zawk.

US President Donald Trump-a administration-in Iran nena sumdawnna nei pawl leh a thawh pui hrang hrang 60 lakah hremna thar a puan rualin, Iran nena thawhdunna nei ramte pawh hremna in a zui tur thu a sawi.

Amaherawhchu, All India Rice Exporters Association general secretary Ajay Bhalothia chuan buh hi mihring mamawh leh ei tur pawimawh humanitarian exception a nih vangin sanctions hian a khawih pawi loh a beisei thu a sawi. Indian exporter-te hian UAE, Germany, China leh Turkey kaltlangin sum dehchhuah nan an kalpuia, harsatna tawk loin buh leh damdawi, thingpui thawn chhuah zel a nih thu a tarlang bawk.